دوستان این داستان بلوچی

دوستان این داستان بلوچی رو بخونید خیلی زیبا بود
لباسهای مهناز
مهنازا يك ساليا رند پشك دوتك و تيار كت كه مني لوگ واجه كيت و من پشكا گورا كنان و وتي بانوريَے يادا نوك كنانگون همی حيالَے آيگا، وتي ديمي په لج چير دات و چمّي بند كتنت و گوستگين يادان وتي امبازان زرت.
آ وتي بانوري وهدَے تَهتالا كپت كه آيي دشتار چه ولايتان په سير ا آتكَگَت.
آ چونين وشين روچي ات كه آيي بانوراَت ، علي آييَے چَپّين كشا گون سالونكي پوشاكان نِشتَگَت
وشين بوّاني آ تاران لوگ سرا زُرتَگَت
مهنازے دَزگُهار په كِيْنَگ آييے تالهَی (طالع) سرا بَش بَش ورگايتَنت
مهناز آمڑ رِتَگين دنتان و مُزواك مالِتَگين ركّاني سرا سا ايركشين بِچكَنديا سنگر بَستَگَت
آيي چَمّاني نشانگ عليَے زرد ات آ گل اَت، چه گلا آييا دگه رنگي زُرْتَگ سَے ماهاني وشي و گلي چه سي روچان هم كمتر اَتنت ،گڈي شپ دويينان په گريوگ و هيسكارگ روچ كُت
آ مروچي هم گريوَگَت و اَرسي چو بَشّي رگامَے وڑا، رِچَگااَتنت
همي دَمانا تهتگا (دروازگا) توار كت، مهنازا زوت زوتا وتي اَرس گون سَريگَے لمبا پَهك كُتَنت
آييَی ناكو محمد لوگا پِتِرت و گُشتي: مني چُك ! تو گِريوَگايے؟
مهنازا پسّو دات: اِنَّان ....... ناكو من گِرِيوَگا نيان!
بلِي آييَے لُنٹ لَرزَگااَتنت
مهنازے ناكوا گُشت: من زانان ترا اِدان وش نَبيت، ترا وتي مات و پت ياد آيگااَنت ....... من ترا باندا تيي مات و پتَی كِرّا بَران.
مهنازا هِچ پسو نَدات بلے وتي دلا گُشتي منا وتي مات و پتَے واستا زهير نكَنت ، منا وتي زِندَے واهند و لوگ واجهَے زهيران زُرتگ، ای اَرساني هار، ديرسَرِيْن كَور اَنت كه چه دلَے جُهلانكيا پيداك اَنت.
زمستاني شپ و گرماگي روچ دوين په وهد آتك و شُتَنت، مهنازا شپ په گِريوگ و روچ په زَهير گُوازِينت اَنت.
شپان وَهدی كه آمنه جَنتِرَے بُنا نِشت گون جَنتِرَی ساز و زيملا آمنهَے وشين و دردآورين زهيروكَے توارا مهنازا هم گُٹی گريت و زمستاني شپي همي دابا روچ كُتَنت
پَنچين سالاني دوريا مهنازَے واهگ هم پير بيتَنت.
پنچ سال رَند علي وتي مُلكا آتك لوگَے رَوَگا پيسر آ بازارا شُت كه وتي لوگَے مردماني واستا سوگات زِيران، يك دكانيَے دِيما يك بلوچي پَشْكی دِرَتكَگ اَت گون تناب و پدواران بلوچي دوچان سَك ڈولدار اَت، عليا گُشت اي پشكا وتي لوگَے بانكا دَيان آ وهديكه پشكا گِندِيت سكّ گَل بيت.
علي وتي هلكا سر بيت، شپا وهدی كه دويين ايوك(تَهنا) بيتَنت، عليا پيتي پچ كت و همي پَشك مهنازا دات
مهنازا پشك زُرت و وتي دستاني دلا كُت و هُشك و حيران بوت، آييَے چَمّ چه اَرسان گُلگُل بوتَنت.
عليا جُست كُت:
تَرا چي بيت؟
مهنازا په هيسكارگ گوشت:
ای پَشك چار سال پيسَر من په مُرادی دوتكَگ اَت، هپتگی پيسر من پشك چاراِت كه مني گورا گونڈ اِنت من چِست كُت يك پكيريا دات، همي پشك تو پدا په من آرتگ
شوهاز:محمد صديق دهقان

از صفحه بلوچی بوان